隨心

今日清理檔案時，無意中發現呢篇未曾上載嘅文章，記錄於2014年11月19日，小產後10日，記錄當時嘅心情。

“幾十歲人，我明，年紀大並不等於成熟，但你哋都好應該學習吓觀人於微，我愛玩，並不等於我做事冇分寸；我愛天馬行空，並不等於我做事唔按部就班；我愛自由自在，並不等於我會唔經大腦就衝動行事。

但總有事情不能盡如人意，過山車嘅心情，都要花時間處理好。直至事情張揚後，意想不到嘅壓力又嚟喇!聲音仲要各走極端。

有人會話:「你哋諗清楚未架?呢啲事唔係講玩架!」(呢條問題，其實我已經唔想答。多謝你以為我仲係18歲。)

「你哋搞咩呀?點解咁架?」(大佬呀!我哋冇殺咗人呀!)

「之前冇聽你哋講過嘅?你哋唔係話唔諗嘅咩?」(一個人嘅想法，唔同時候有過唔同經歷後係會改變，有幾奇呀?再返到去問題嘅最基礎，家庭嘅事，唔係我哋兩個人意見一致就可以嘅咩?)

又有啲人，另有高見。

「一早都叫你唔使諗咁多架啦。諗咁多，咩都唔使做喇。」(但係仲有好多人覺得我唔經大腦貪得意喎。)

「諗咁多做咩?諗到十年、廿年、三十年以後嘅事又點?條路一定會跟你PLAN住咁行架?咪傻啦!」

「點解唔可以做自己想做嘅事先?你又唔係去害人。」

多謝大家對我嘅溺愛，啱唔啱聽嘅，我全部都會收下。

好多時候，壓力都係源於過分嘅關心，呢啲壓力，不期然已經影響緊我當時嘅心情，再影響埋個結果。我有時諗，點解唔可以比我簡簡單單又輕輕鬆鬆咁選擇自己要行嘅路呢?我唔係一個喜歡纏住一身秘密嘅人，事無不可對人言，但總係有啲時候，為免太多嘈雜聲音，不得不將自己好好地隱藏起嚟，只因實在有太多想法太多可能性太多既驚且喜嘅事情會發生，自己能力有限，未能好好控制處理情緒，所以暫時將自己變成隱形，變成你哋眼中嘅口密人。

經驗係可以分享，過來人嘅心情，我都願意聽多啲，但企圖控制我，我真係會唔開心，我相信冇人喜歡喺別人嘅操舵下生活。

隨心，原來真係唔容易。”