辟穀，我聽過，但一直唔敢試。我知我弱點，唔餓得，但又唔飽得，係，我個人比較麻煩，尤其呢方面。
但我同事邀請我一齊試吓辟穀三日，只飲水，我唯一嘅目的，係想讓我勞累咗幾十年嘅腸胃休息休息。見佢雄心壯志，就膽粗粗應承同佢試吓。
我堅持咗 33 小時，我放棄咗，完，真羞家。
同事好叻，一路堅持，今日係佢既第三日，今晚九點，佢就完成 72 小時呢個療程，真係好唔簡單。
唔知點解，同事今次好堅定，係比佢任何情況都堅定，今朝佢仲滔滔不絕去描述點樣保持正念、意志，如何達致修煉效果等等。
我念頭一轉，就衝口而出講咗一句“如果你對香港人嘅人權、自由有著同一樣嘅堅持、意志，你話幾好呢?”
同事即刻轉話題，我知衰，我都跟住一齊轉，轉到天涯海角，我都唔知自己之後講咗去邊喇，務求草草了事，告一段落算罷。
我又犯咗成日犯嘅毛病，明知不可為而為之。
放心，我信念冇被消磨，只係唔想再花時間喺唔適合嘅人身上面咁啫!
我好怕人自稱政治中立，講到尾都係自私精；
我好憎人有兩把尺，對唔住，俾我粗俗一吓，容己狗不容人狗最乞人憎；
我好驚人大愛到一個點，接近愚；
我都好怕人一日到黑將“感恩”掛喺嘴邊，好多嘢應該去做而唔係得個講字；
我仲怕人過份地客氣，我會搞唔清邊個係你；
我又怕人扭扭擰擰，我會走咗去。
其實我個人真係幾煩。
